冬天一到，最怕就係變人亁，口亁、鼻亁、唇亁、皮膚更亁，身子再差啲就成日咳，更慘仲要便秘……苦不堪言，全部都係一家之「煮」入冬後，要為家人解決的頭號問題。中醫講究固本培元，滋補藥膳唔少得，醫師指出，胡桃仁煲湯可防口唇脫皮；桂圓肉整甜品既Sweet又潤膚美顏，加埋枸杞子，男士溫腎補陽都掂。要調理家人身子，真係要將食材食味功效認清背熟，咁先至夠Pro。
記者：劉昱蘭
攝影：黃子偉
模特兒︰Algie
示範：讀者劉太
食譜提供︰本草安和堂中醫藥中心
李世德中醫師（29794168）
太子參蓮子大棗湯
需時︰1小時20分鐘
材料︰太子參12克（或花旗參6克）、蓮子40克、大棗40克、冰糖或蜂蜜適量、水4碗
做法：太子參剪成小段後洗淨，蓮子浸20分鐘後去皮，大棗浸10分鐘洗淨。蓮子和大棗先加清水煮熟，隨之放入太子參和冰糖，煮至蓮子腍身即可。
點解滋潤︰所有材料主要能健脾益氣，中醫認為「肺主皮毛，脾主肌肉」，所以健脾可能滋潤肌膚。而且蓮子和大棗，亦能養心寧神。
健脾湯水︰胡桃仁烏雞參湯
需時︰1小時10分鐘
材料：花旗參6克（或黨參15克）、淮山15克、芝麻30克、百合15克、胡桃仁30克、杏仁12克、豬瘦肉8両、烏雞1隻、鹽少許、水12碗
做法：瘦肉汆水切片，所有藥材洗淨放入鍋中加水煮沸後，加入烏雞改中火煲1小時，最後加鹽調味。
1芝麻︰強化腸胃，而胃主皮毛，改善皮膚亁燥，大便燥結
2杏仁︰潤肺止咳
3花旗參︰健脾補氣
4胡桃仁︰改善脫皮及便秘
5淮山︰健脾
6百合︰潤肺
潤肺湯水︰沙參玉竹瘦肉湯
需時︰2小時
材料：沙參/玉竹各15克、百合12克、銀耳10克、蜜棗4枚、豬瘦肉200克、水5碗、鹽少許
做法：銀耳發透去蒂洗淨，豬肉汆水切片；藥材洗淨，裝入紗布袋紮好袋口，與蜜棗同放鍋內加水燒沸，下豬肉片燉1小時，再放入銀耳多燉45分鐘，取出藥袋，加鹽調味即可。
1沙參︰滋陰清熱
2百合︰清熱潤肺
3蜜棗︰益氣生津
4玉竹︰能潤養陰，生津佳品
5銀耳︰滋陰潤肺，益胃生津
6瘦肉︰補血氣
枸杞桂圓青果甜糕
需時︰30分鐘
材料：枸杞子6克、桂圓肉30克、青果30克、冰糖或蜂蜜適量、魚膠粉4茶匙（以水1/2碗開成）、水11/4碗
做法：枸杞子、桂圓肉及青果洗淨，放入鍋中加水煮沸，5分鐘後放入糖，再多煮3分鐘取出，可作糖水食用。若凍食則可另煮沸魚膠粉水（煮時要不時攪拌），與甜湯混和，攤涼後，放入雪櫃，雪至凝固即可。
港姐最愛雪耳養顏
點解滋潤︰此甜品滋陰靠青果，補血靠圓肉，潤膚美顏。桂圓肉補心補氣血，保持臉色紅潤；青果滋陰兼潤喉，又可改善皮膚亁燥的問題。另外枸杞不但明目，亦能溫腎補陽，是冬天消除疲勞、補身保暖佳品。
陸詩韻︰我好鍾意食湯渣，煲雪梨雪耳糖水，一定會加紅蘿蔔同粟米，既清甜又可拎湯渣返工慢慢食。雪耳唔難搞，仲咁潤肺，煲出糖水味道又清，所以真係冬天必食。
葉翠翠︰雪耳滋潤養顏，媽咪一入冬就成日用佢煲糖水畀我食。仲有紅棗水，媽咪每星期都煲，佢話夏天唔啱飲，因為好燥熱會出暗瘡，但冬天飲就暖身喎，我覺得飲咗之後面色都紅潤啲。
