理工大學轄下專上學院第一個獨立校舍噚日平頂，負責起樓嘅其士集團，主席周亦卿到場做嘉賓。有記者問佢，幾個月前傳聞話，佢幫TVB介紹買家，𠵱家進展點，但佢不斷耍手兼擰頭，話係咸豐年前嘅事，唔講都唔記得喇，仲強調自己趕住過海，搞到冇鞋挽屐走咁款。
送禮物玩神秘
華華記得舊年11月，佢嘅愛女周蕙蕙同無綫藝員吳家樂生咗個孫女，於是截住周生，問佢做咗外公嘅心情，佢一聽到孫女兩個字，就即時變咗四萬咁口。
周生話，孫女已經起咗名，不過就唔肯講畀華華聽；問佢孫女似爸爸定媽媽多啲啦，佢叫華華自己睇。咁孫女會唔會擺滿月酒呢？佢就笑晒口話，滿月酒實擺，但係就猛叫華華之後打電話畀佢問詳情喎。金豬年就到，周生會唔會送禮物畀孫女呢又，佢就神神秘秘咁話遲啲先講。
平頂儀式之後，周生同潘宗光校長豪切6隻燒豬，唔知周生會唔會送隻金豬仔畀孫女呢？