07年投資特攻隊第一次同各位球迷見面，先同大家講聲新年快樂；新一年球迷或者有好多新計劃，好似買車、買樓同結婚等，不過大家賭波又有冇一個完整計劃呢？
相信唔少波友都有以下經驗，到星期六大賽日，下午好神心咁就入定一千幾百入投注戶口，躊躇滿志想同馬會博過；上半晚係就係好順，幾場重心都中正，不過愈夜愈心雄，以為有運行，不論係唔係心水，注碼都愈來愈大，結果倒輸番轉頭後，又唔順氣，到尾場連戶口剩番幾多都推埋落去，結果係點？第2日又入過錢囉！
忌為追數加大注碼
玩股票有賺價位同止蝕位，其實賭波都要有；當你入1,000蚊落戶口，就先問下自己究竟想贏幾多錢先；當然大貪球迷會話，贏錢邊有人嫌多，最好梗係望贏一百幾十萬啦！如果你咁諗，小弟建議你改買六合彩，因為呢種純粹係撞彩心態。以投資式賭波角度，1,000蚊本，一晚諗住贏500蚊，已經係幾好回報率；當你希望贏500蚊呢個目標，就要有周詳計劃，將投注比重集中在最有心水的一、兩場波，千祈唔好亂石投林；當真係贏到呢個目標，就要收手，唔好貪心。
有賺價位就有止蝕位，賭仔最唔好唔服輸，頭場輸咗就想追數，注碼愈推愈大，到頭來愈輸愈多，所以賽前要有一個止蝕位。馬會已經對波友着想，只收現金，唔收信用卡，甚至口數，本身有幾多就輸幾多；小弟就有朋友賭開一千幾百一場波，不過為追數，一夜輸近10萬；所以止蝕位同樣重要。文：牽牛