「Dom...Dom...Dom...」香港政府嘅廣告教曉各位男女交往時最緊要安全為上，同性伴侶歡樂時最好戴安全套，唔好成日玩即興，但喺巴西或者缺乏安全意識嘅灌輸，所以森巴球星嘅私生子新聞常有聽聞，而巴塞隆拿中場朗拿甸奴就隨時因孽債被私生子分身家！
現月付11萬贍養費
巴西法庭之前就判咗細哨要為同舞蹈員維安娜，翻雲多夜後所生下嘅兒子畀贍養費，但數目只係對細哨微不足道嘅每月4,700美元（約3萬6千港元），以及為買個住宅單位畀對方同埋保鑣費而已（巴西治安唔好嘛）；點知細哨唔知係善忘定係忘情，去年11月，法庭判細哨畀多一倍贍養費後，後者突然唔願畀保鑣費，搞到維安娜再次入稟索償。
結果法庭愈判愈重，最新判決係要求細哨付出每月14,000美元（約11萬港元）畀兩母子，同埋必須繼續付保鑣費，而且佢哋仲會對呢位球王嘅財產深入研究一番，或者將來會再調整咁話！
細哨年少輕狂留下嘅孽債依然跟身，令佢煩惱非常；我求大俠唔知細哨對祖國法律認識有幾多，但如果佢知巴西小孩有權獲得父親15%至40%嘅收入，可能騰雞又腳震，唧都唔識笑！
「我求大俠成日聽人講『好就女人，唔好就累人』，但又有說『牛唔飲水㩒唔到牛頭低』，但個人倒覺得『色字頭上一把刀』最為中肯！哈！」