周星馳拍完電影《長江七號》，𠵱家忙緊幫套戲做後期。另一方面，佢都開始同啲編劇諗緊下部戲要開乜嘢題材，不過佢老友馮小剛就想搵星爺同葛優合作拍部喜劇，認為呢個組合肯定會擦出火花。馮仁昭都好期待佢哋三個合作拍戲，不過噚日打電話畀星爺，佢話：「馮小剛冇同我講喎！都唔知係唔係，等佢真係搵咗我先講啦！」
嫌華仔太in
此外，𠵱家馮小剛喺東北拍緊電影《集結號》外景，早幾日葛優仲去到當地探班，嚟到咁遠探老友，馮導演梗係感動到飛起啦，佢話有啲唔好意思，因為部戲之前諗過想搵呢位老拍檔擔當其中一個角色，但由於年紀嘅考慮，要搵年輕啲嘅演員，所以就放棄咗搵葛優。不過馮導演點都諗唔到葛優冇份拍，仲咁有心嚟探班，所以佢講明下部戲一定搵葛優做。
馮小剛又話齣戲都有諗過搵劉德華，但由於華仔太有時代感，一樣唔啱做，所以𠵱家個角色就落喺內地演員張涵予身上。
