新年前飲茶，碰到肥仔T，以為佢返來放假，之後返米蘭讀書，點知肥仔T話：「讀完咯，啱啱畢業，返嚟香港搵工。」一年前先至話去意大利讀設計碩士，咁快就讀完嘅？肥仔T話：「MA課程係一年貨仔嘅啫，讀完課程，寫篇比較短嘅研究文章就搞掂。」肥仔T喺美國RhodeIsland名校讀建築學學士，在紐約工作五年，做燈光設計，表現良好，老闆唔捨得佢走，但肥仔T仰慕意大利設計之盛名，係要辭工去米蘭一間設計學院學習。眨吓眼讀完，肥仔T話幾懷念香港，返嚟見番啲中學同學，感覺良好，決定唔返去紐約舊公司打工咯。
原來意大利一啲設計學院與英國某些大學掛鈎，上堂在米蘭，但肥仔T嘅碩士學位由威爾斯大學頒發。佢就志在學嘢，邊間大學畀學位，一啲都唔介意。佢話到意大利除增廣見聞之外，有機會見到一啲世界著名設計大師嘅作品，眼界大開，果真擴闊視野，但如果再嚟過，佢會揀去羅馬，羅馬有好多藝術真蹟，睇到目不暇給，住一年羅馬勝於住一年米蘭。
咁有乜新知學到呢？肥仔T話有同學聽教授指導，研究粉紅色在日本之深層意義，粉紅色包裝與粉紅色產品究竟在日本是否吃得開，呢個意念非常pomo，佢哋成班學生對粉紅色都發生興趣，愈做愈興奮。
剛啱藝術B行入餐廳，問佢pomo究竟係乜意思？藝術B話：「Pomo即係『後現代人』post-modernists，廣義啲講，係歐洲新左派如Jean-FrancoisLyotard，JacquesDerrida，MichelFoucault等學派嘅追隨者。」Pomo與設計有乜關係？藝術T話：「大矣哉，肥仔T去到米蘭可以親身體驗到，見識不淺。Pomos注重個人慾望喜好與選擇之能力，人人都可以做藝術家。譬如粉紅色，如果你做到一隻有特色嘅粉紅色產品，話唔定可以打動全世界鍾意粉紅色藝術之消費者，可以發達㗎！」藝術B跟住叫左丁山睇吓○六年最後一期《經濟學人》學多啲。