近日電視重播《PTU》，發現其對話很適合套用在一眾自由行旅客身上。
團友A：聽講前排有班同志被人丟咗喺條街度，連酒店都冇得住。
團友B：佢哋自己儍啫，零團費都夠膽博。
團友A：咪係，其中一個同志仲係我識㖭呀，平時見佢都唔知佢咁勇。
團友C（嚴肅地）：同志嚟㗎。
團友A和團友B不禁沉默，有點慚愧無言。
團友C：戴得起個章，都係自由行。
團友A：最緊要係返到屋企。
***
一眾團友在街上罰企半個小時後，終於被迫進店內買東西。出來時領隊看着他們。
領隊：冇嘢吖嘛你？
團友誠惶誠恐：冇……冇嘢……我不嬲都好鍾意買嘢。
領隊：係你自己話要買嘢㗎咋。
團友：係係係……咁我哋有飯食未呀？
***
團友（厲聲地質問領隊）：點解唔行廣東道？
領隊：廣東道有塞車，又冇名勝，舖頭又窄。
***
棄團領隊面對旅遊協會指責他棄團和屈團友買東西，進行的內部調查時所作口供：本人尹志文，旅行社牌照號碼3202219，隸屬永通旅行社九龍自由行B隊領隊，喺本年十月七日，我帶同十多名中國籍男女，於土瓜灣金行街附近，進行刺激香港經濟活動，其間有數人形跡可疑，於是我上前盤問，幾名CM馬上反抗，唔買嘢之餘仲企圖搶我支旗仔，跟住逃去無蹤……