噚日大市似坐過山車，只要冇畀大戶震走，散戶仲有得執。不過，唔係個個揸住股票嘅都短炒，好似恒隆地產執行董事吳士元，有大批恒隆認股權喺手，都唔受大市引誘，唔行使option，更加唔沽貨。
舊年一眾恒隆管理層喺大陸幫公司搵靚地，風塵僕僕，恒隆主席陳啓宗年尾犒賞群臣，又分咗一批option畀管理層，吳士元當然有份。根據聯交所資料顯示，吳士元獲發嘅新一批認股權證分別涉及170萬股恒隆集團股份及330萬股恒隆地產股份，行使價分別為20.52元及17.14元，雖然恒隆地產（101）及恒隆集團（010）繼星期二隻隻創出新高後，噚日一齊調整，但孖寶仍分別收報18.52元及23.05元。以昨日收市價計，吳士元新近獲得的一批option賬面分別獲利455.4萬元及430.1萬元。
翻查紀錄，佢加入恒隆以來，共獲發3次恒隆集團及2次恒隆地產嘅option，首批恒隆集團認股證行使價只係5.87元，恒隆地產亦只係9.2元，一計之下，他手上嘅option若果行使咗換做正股，噚日賬面就賺7939.4萬元，陳啓宗對員工果真「識做」。不過，吳士元同華華講暫時仍係「紙上富貴」，因為「認股證係自己嘅長線投資，長遠睇好冇理由咁就行使咗佢，一於揸到底。」