秘魯酸辣醬當Wasabi、柚子汁當豉油你聽過未？聽落好似完全唔夾，若果話你知連里安納度、麥當娜、史提芬史匹堡都讚好，會否即刻好想試？這些創新菜式以前只在外國NOBU先食到，但現在香港人唔使得個恨字，皆因國際級創新日本餐廳NOBU終於登陸香港！
記者：林思樂 攝影：譚盈傑
麻油當日本豉油
由國際知名日本廚藝大師松久信幸（NobuMatsuhisa）創辦的NOBU，已進駐香港洲際酒店，定必成為07年至Hit食肆！NOBU已有20年歷史，以大膽創新的日本菜式聞名國際飲食界，皆因松久信幸經常四處遊歷，將各國特色融入日本菜中，例如以秘魯酸辣醬當Wasabi、以麻油代替日本豉油，而且他有無限創意，生活的一點一滴都能激發創作菜式靈感，例如冰鎮吞拿魚魚生、魷魚扮蜆殼粉，每道菜都充滿驚喜。NOBU的前衞菜式在20年前不是人人接受，時至今日仍叫人嘖嘖稱奇，吸引很多人慕名一嚐其滋味，業務遍及全球主要城市，如美國比華利山、拉斯維加斯、紐約、倫敦、米蘭，每年總營業額逾1億美元，單是NOBUNewYork就要聘用4位全職接線生每日應付1個月前的訂位，可想而知NOBU幾咁受歡迎。
海洋鄉郊自然混合
香港NOBU的裝修亦一絲不苟，以天然作主題，營造出海洋與日本鄉郊的味道，新店分酒廊、餐廳、貴賓廳3部份，酒吧不設訂位，有過百款美酒讓客人品嚐，環境舒適。餐廳設有壽司吧和餐桌座位，需要1個月前訂位，可飽覽維港景色，大量桃木和暖色系的裝潢，給人溫暖的感覺。
拖羅魚韃靼配魚子醬$350
有次松久信幸製作拖羅時電話響起，於是把拖羅放入冰箱，但轉頭忘記了，隔了很久才拿出來，點知發現拖羅凍食質感更豐潤，更富油脂香。加入洋葱碎和蒜茸，配以冰鎮新方法，果然夠Fresh。
魷魚粉$165
有一對母子幫襯美國NOBU，母親說兒子除了Pasta甚麼都不吃，松久信幸就想到以魷魚扮蜆殼粉，小朋友竟然俾佢呃到，之後這菜式就納入菜單中。
魚生沙律配
Matsuhisa醬$240
麻油配吞拿魚刺身竟然出奇地夾！醬汁以松久信幸命名，以芝麻和蒜茸製成，好多即食麻油麵的醬汁都參考此醬的做法。
日式帶子配
秘魯酸辣醬$200
食刺身不一定點豉油和Wasabi，松久信幸就用柚子汁取代豉油，以秘魯酸辣醬代替Wasabi，更能帶出帶子的鮮味。
小蝦天婦羅
配香辣忌廉醬$150
怎樣也看不出是天婦羅，看上去一點粉都沒有，原來是以勁快手勢將蝦球沾上薄薄的粉，所以看上去蝦球晶瑩通透。
食神評級（5★為滿分）
食物︰★★★★★
環境︰★★★★★
服務︰★★★★
價錢︰★★★
讚:食物創新，其他地方食唔到，價錢以國際級餐廳來說都算合理。
彈:要一個月前訂位不夠方便，不可以想食就隨時食到。
睇路搵食
NOBUInterContinentalHongKong（23132323）
地址：尖沙嘴梳士巴利道18號香港洲際酒店2樓
營業時間：6:00pm-12:00mn
座位：200個
交通：尖東九鐵站J出口