特首早排喺北京述職時講過，𠵱家香港係廿年嚟最好景時候，港股每日成交額成500億，恒指不斷創新高。舊年榮升「香港畢菲特」嘅恒地（012）主席李兆基，有傳媒叫佢估吓後市，佢就耍太極冇表態；不過，一向火辣辣嘅「賭王」何鴻燊前日斷言，本地經濟向好，未見泡沫，仲做埋「大好友」，豪貼未來9個月恒指見25000點，亦重申支持煲呔連任。託賭王嘅鴻福，港股噚日再飆103點，收市報20413，全日交投640億元。
玩21點玩大咗？
賭王咁猛料，難怪兩日嚟網友喺《香港討論區》留言不絕。包抝頸嘅Yatw認為：「見人李兆基做亞洲股神做得過癮，眼紅。」la~vie~en~rose話：「佢以為自己係基金經理定李兆基上身？」抽秤「八萬五違背良心論」嘅fishchow力數：「由老董年代開始講大話，佢講大話當飲礦泉水，飲少日都唔得。」fanclpro亦幫嘴：「何生以前講過佢講嘢係唔負責任，願者上釣。」有網友仲話賭王：「玩廿一點玩大咗，玩到二萬五點。」
不過，「信徒」霧裡看花話：「我信，個市跟住A股，只要大陸繁榮昌盛，見二萬五有何難。」
小心撻落萬八點
新鴻基證券策略師彭偉新認為，中資金融股的確有少少泡沫，現價入市純粹炒供求失衡和未來潛力，4月業績公布期或會陸續出現見頂訊號，但仍看好上半年整體市況，主要是全球經濟依然向好。
他強調網友以06市況，預估07高位並不妥當，因股市並非以時間衡量走勢。
港股現時市旺只側重於中資股，未見盈利基本因素支持大市在9個月內見二萬五，彭偉新認為，若屆時美國經濟擴漲周期完結，中國出口勢將減少，恒指或挫至萬八水平。