馬德鐘噚日去新城宣傳佢首本烹飪書《鐘意廚房》，講到新劇《爭霸》收視普通，仲有網民指佢嘅緋聞女友郭羨妮扮西施年紀比較老，馬德鐘力撐女方話：「我之前喺內地都聽過，不過我做嘅夫差都唔係嗰個年紀啦。」馬德鐘又否認因為自己形象差拖低收視，佢話：「呢兩個禮拜假期嘛，希望遲啲會好啲。」佢仲透露太太同個仔已經由法國搬返香港暫住。