陳苑淇舊年因為經理人公司忽然執笠，令佢變成無主孤魂，所以近呢幾個月都係無所事事。早幾日佢約埋鄧穎芝出席霍啓山做搞手嘅聖誕派對博釣金龜後，前晚佢又繼續夜蒲，仲拖男帶女連踩兩場。
坐足兩粒鐘
前晚8點幾，身穿白色長冷衫，露出一雙長腿嘅陳苑淇，同幾名女伴一齊去位於中環蘇豪區嘅boco餐廳食晚飯，其間仲陪女伴去7仔買雜誌。只見陳苑淇喺店內行嚟行去，揭吓雜誌又放返原位，似乎相當無聊。之後佢陪女伴返餐廳，前後坐足兩個幾鐘，臨走時仲同班朋友喺街頭擁抱道別。
同班娘子軍拜拜後，陳苑淇仲未捨得返歸，一個人喺街頭遊蕩，跟住就行去卑利街嘅山餐廳再坐過。
掩口擰歪面
原來陳苑淇約咗兩名外籍男士同幾名洋妞傾偈打發時間，不過佢哋成班人都好健康，個個齋飲水，食飽後嘅陳苑淇齋坐吐苦水，表情多多。後來有記者上前影相，陳苑淇即刻掩口兼擰歪面，同枱嘅外籍友人就一邊面壁一邊同記者講「nopicture」，反而陳苑淇就粒聲唔出，反應真係與別不同。
