「陪太子讀書」唔單止發生喺年代久遠嘅中國，即使𠵱家嘅上市公司都唔例外。上個月中，新鴻基公司前主席狄亞法（圖）啱啱先辭咗個主席兼非執董職位唔做，華華見佢已經年屆65歲之齡，以為佢會退休歎世界，點知噚日先知，原來佢未有咁早退休，兜兜轉轉又返去同係李明治家族旗下嘅聯合集團及聯合地產，填補05年底辭職嘅前主席麥蘊利個位，擔任主席兼非執董。
其實都係做主席兼非執董啫，點解要兜咁大個圈呢？新任新鴻基個主席位就畀咗李明治細仔李成煌，咁聯合集團又點呢？原來一早就有李明治大公子李成輝同二女李淑慧坐鎮，分別擔任行政總裁同非執董職位。
咁嘅安排，睇嚟狄亞法可能係讓個主席位畀細公子上，等佢獨立吓，學吓點樣去管一間香港上市公司。至於狄亞法今次空降聯合集團做主席，好可能係要幫大公子一把，等佢更上一層樓啦。