新一年開始，唔少準買家蓄勢待發，諗住農曆新年後入市買樓，所以呢排各討論區多咗好多關於置業嘅問題。Tonywin2802喺《香港討論區》問，如果買樓自住，一手定二手好？呢類老掉牙嘅題目，就好似買樓定租樓好，雖然永遠唔會有答案，但仍吸引唔少網民踴躍發表意見。
近20個回應中，多數人支持買二手樓，suileechi義無反顧話：「梗係二手啦，仲要大型屋苑，原因係實用率高。不要給新樓呎價誤導，以為跟市價貼近，但用實用面積除，就知道其實比二手貴很多，更何況𠵱家新樓呎價已經比二手貴。」仲話貪新樓係好儍行為：「新樓始終會變舊樓，除咗樓齡，過幾年咪同其他二手樓冇乜分別。」
eddieywlee都認同買二手好啲，不過要注意屋苑多唔多翻新，咁樣先會保值。騎牆派yellow2528就話：「新樓都可以考慮，不過等入咗伙睇清楚先，記唔記得『四季XX』單嘢！」mike30就覺得新樓雖然貴，但勝在無人用過，畀到一種「處女」嘅感覺佢，認真大男人。
估價不足機會低
講咁多，其實兩種物業都各有好處，睇吓買家係邊類人啦，victoriaahpak就總結得唔錯：「新樓好適合啱啱買樓嘅人，未識睇樓宇好壞，對裝修沒有多大認識，亦不會有估不到價情況；但二手樓就適合已經有一定首期，甚至想有個人品味裝修人士，全屋甚至間隔都可以大執。」
基本上不論一手或二手樓，都一樣有人支持，只不過舊年個市淡，美聯物業統計過，06年一手樓只有12,158宗成交登記，比05年少咗19.3%；二手樓更加跌咗20.5%，得70,209宗。