鄭中基（Ronald）出道至今都10年幾，除咗之前嘅財務公司廣告外，拍親嘅幾乎都係飲品廣告，當中包括綠茶同啤酒等。最近Ronald又接咗個新廣告，咁啱又係飲品，呢個就係之前謝霆鋒好鍾意揸住嘅可口可樂喇。不過霆鋒𠵱家唔係代言人，所以嚟緊成日揸住罐可樂嘅，可能變成Ronald。
揸汽水非模仿
個廣告日內開拍，Ronald會走遍港、九、新界，內容係話佢呢位《美女廚房》主持都好鍾意四圍搵好嘢食，但嚐盡天下美食嘅同時，佢都要搵汽水嚟配搭。馮仁昭噚日問過Ronald，佢死都唔肯透露收幾錢酬勞，不過應該至少有100萬，Ronald話：「廣告商嘅宣傳費係1,500萬，單單宣傳成效，我都抵晒啦。」問佢會唔會學霆鋒呢位前代言人咁hardsell，去到邊都揸住罐可樂？Ronald就話：「千祈唔好比較，我本身都好鍾意飲可樂，平時見我飲並唔出奇嘅，但唔代表我學人，最緊要係飲得開心，大家唔好太敏感。」
