求驗客前晚同南華足主羅傑承食飯時收到好料，聽羅生講，佢話好想今個暑假拍番套以南華為主題嘅足球電影，初步構思會搵隊長文彼得擔正做主角，內容多數圍繞羅生嘅搞波中心思想，就係帶領南華衝出香港打中國超級聯賽。
羅生上年7月接手管理南華後，除咗即時擴軍同搵外援，佢仲叫太太梁芷珊幫班球員改變形象；好似喺四季酒店舉行嘅季前記招時，南華一班球員全部着上灰色西裝，就連「大猩猩」廸天奴都型仔好多。
伊健阿B周麗淇助陣
經過半個球季後，羅生最近又有新構思。一向有拍電影嘅羅生，打算在暑假期間拍番部關於南華嘅足球電影，除咗搵現役球員親身演出外，羅生旗下BMA唱片公司嘅演員，好似鄭伊健、周麗淇、以及新簽嘅「阿B」鍾鎮濤等，都有機會演出。至於主角人選，羅生就睇好全個球圈最靚仔嘅南華隊長文彼得演出。以前Peter仔係英皇嘅時候，都拍過容祖兒嘅MV，最近佢已由英皇過檔BMA，應該幾大機會搵佢做主角。
故事內容方面，由於羅生好鍾意《一球成名》呢套足球電影，所以都以勵志為主，不過今次就以南華為主題，描述球員不斷努力，最後成功帶領南華打上中超聯。
「南華在現實中要打中超聯，可能不易成功，今次足主羅傑承將呢個理想放在電影，希望可吸引更多球迷入場，令此目標成真啦。」