今年首個交易日，港股發力再上，股民既喜且驚，更多散戶望「市」興歎，《香港高登討論區》內真．6-2以「股災？」為題話：「現今無論幾錢沽咗貨都撞板，之後又心癢再追番，又賺再沽，沽咗又升，又心癢再追番，又升再賺，直到永生！」
芝士條2和應：「股市現水平已遠超合理水平，我選擇唞唞先，只繼續持有江西銅業（358），因為真係覺得唔安全，如果現在入市，我驚第二日個市會大跌。」
有人見股市愈升愈心寒，諗住「辭官歸故里」，相反有網友就愈升愈興奮，實行「漏夜趕科場」。真無名話：「股災都聽咗好耐，但升勢好勁，連大陸都咁，睇嚟升勢仲有，但搵唔到邊隻落後股好追。」
另外，喺《香港討論區》亦有諗住長線投資嘅網友見個市旺，想跟風短炒，小浪子話：「𠵱家買仲有得上。」不過好多網友就嫌𠵱家股價升得太高，etchal2002話：「睇到自己啲股升，開心，但又唔可能喺現水平再入貨，得個睇字。」philipho0975深有同感：「好認同你的心情，我都想再入啲，但好貴，真係買唔落手。」
搵唔到落後股好追
對於股市位高勢危，信誠證券聯席董事連敬涵話：「唔使驚，市場上仲有人睇淡，散戶仲識驚，想沽貨，又唔敢高追，證明個市仲有得升；到唱淡同識驚班人唔見晒，個市就見頂。」佢預期起碼可以升到農曆新年。
至於現時是否仍可以入市，佢話若手頭有貨，唔好輕易沽出；至於未有持貨的，仍然可以入市，但就要揀升幅相對落後的股份──不過，過份落後或長期唔郁的就無謂博了。