股市上升停不了，甫踏入2007年，滙豐同大新兩家銀行已經按捺不住，率先爆發股票佣金爭奪戰，由於其他銀行仲未嚟得切回應，相信好戲還在後頭。
最啱玩即日鮮散戶
雖然滙豐同大新嘅優惠都針對新客，但係大新嘅優惠似乎比較着數，新客喺3個月內，可以0.1%佣金買賣本地股票，最煞食嘅係交易次數不限，而且不設最低佣金收費，非常適合「即日鮮」客戶。
不過，優惠設有附帶條款：首先，交易渠道只限於網上或電話；其次，客戶先要按正常手續，畀咗佣金先（即成交額嘅0.25%、最低為100元），獲減免嘅佣金，要等到4月20日或之前，先至退回到客戶嘅戶口。
至於滙豐嘅優惠期只得兩個月，但就新舊客都適用，如果客戶每月累積交易金額，超過預先設定嘅「目標交易金額」，超出「目標交易金額」嘅本地證券交易佣金，就可獲佣金減半優惠（滙豐𠵱家收緊0.25%、最低100元，減半係指收0.125%，但仍要畀最低100元）。
「息誘」開設股票戶口
至於點樣設定「目標交易金額」，滙豐話，舊客就係根據過去數月所做嘅交易額釐訂，新客嘅「目標交易金額」係零，即係話所有交易都可獲得優惠。
滙豐更以「息誘」鼓勵客戶開股票戶口，如果喺優惠期內開運籌理財戶口，新資金存1至3個月美元或港元定期，將有額外年利率0.4%至1.2%。兩間銀行率先出招，成績如何，華華拭目以待。