有人話，股市已開始進入瘋癲狀態，豪宅市場又何嘗唔係？識諗嘅，就會趁𠵱家大家都唱好豪宅嘅時候，甩咗啲質素同位置次一級嘅豪宅，走去買番啲傳統保值力強嘅豪宅好過，就算第二日冧價，都會好似大藍籌股咁，抗跌力同反彈力都強啲。
好似賣化妝品發到吧吧聲嘅卓悅主席葉俊亨，上個月趁恒基力谷大埔比華利山別墅，同政府賣山頂地之前，高價甩咗大埔鹿茵山莊23號屋，賺咗1966萬，靜雞雞搬番出九龍塘嘅傳統豪宅住，九龍塘間屋有成6000呎。
大埔間屋面積3392呎，成交價達3866萬，呎價接近1.14萬。其實葉氏之前都揸住幾個鹿茵山莊嘅分層單位，聽講喺04年見個市一起就走晒，賺得唔多，今鋪就賺個開。
另外，恒基搞咗成個月嘅比華利山別墅，送埋幾百萬嘅裝修費，聽講話先賣出17間，但同區二手市場，未計康樂園，都已經走咗10幾間豪宅啦。