中原集團呢排認真黑，繼廉記拉人事件後，噚日又傳搞裁員行動，有5個後勤被炒魷，仲陸續有來，目標係炒20人以上，總之公司內部一片「白色恐怖」。華華即刻搵集團主席施永青求證，佢承認有5個後勤走咗，嚟自推廣部同培訓部，佢哋走嘅原因，純粹係因公司管治尺度收緊咗，唔適應及未達要求，同埋個人理由，與裁員冇關；佢直言裁員潮只係市場誤傳。
施永青估計，可能係後勤𠵱家由何紹章主政，作風同以前唔同，後勤面對嘅壓力大咗，唔適應嘅咪離開囉！老施補充，若果係裁員，三兩吓就搞掂啦，使乜慢慢拖呢。不過，既然外邊有咁嘅傳聞，今日佢會喺內聯網向同事交代事件。
施永青話，集團05年擴張過速，早一年公司已開始採用自然流失方式收縮規模，可能今次係有員工「非自然流失」，先會惹嚟咁嘅傳言。
齊齊發財立品
對於集團接連出現負面消息，施永青強調，無損士氣同埋形象，「睇近兩個月業績咁理想，就係最好嘅證明啦。」
施永青又講，集團未來嘅方向係強調服務同專業性，俗啲講，就係要同事「發財立品」。