港股新年開個靚盤，恒指又升300幾，H股指數都唔曳，進賬293點，港股成交505億元，係少定係多？睇你點睇。
股民放咗咁耐假，可能仲有啲Holidaymood，但有錢搵，股民嘅mood應該更高漲，冇理由畀聖誕老人搞到冇mood炒股票，睇番《蘋果日報》嘅散戶調查，港股升到呢個位，觀望嘅人可能有好多，跌落嚟唔敢買，升上去又唔敢追，可能就係恒指勁升但成交冇乜大變嘅原因。
不過情緒呢樣嘢好容易轉變，相信股民好快又會入番市，其實炒股呢樣嘢大家都好明白，只要肯止蝕，唔好太貪心，乜嘢癲市儍市都可以炒，只不過都係知易行難，好多人去到要止蝕嘅時候都唔願意作出止蝕行動。美股昨晚同內地股市今日休戰，港股可以繼續癲。
中行C輪9457：中行（3988）昨收4.48元，升4.9%，喺3.80元附近唞咗成個月，幾日前先破位上，升勢唔會咁短癮，技術起碼睇5元，破位睇5.30元。
中行C輪9457昨收49仙，槓桿率9.1倍（有效7.2倍），對沖值0.79，正股繼續升，引伸波幅可以掉頭上，擴大隻輪嘅升幅，正股升上5元，9457會喺90仙樓上，就算正股升上4.80元，隻輪都會升5成，買番啲，正股跌穿4.30元止蝕。
工行C輪4977：工行（1398）做咗全世界銀行嘅「二哥」，果然唔同晒，啲錢源源不絕咁湧入嚟掃貨，昨日升上5.11元收市，睇嚟好快升上5.60元，破位看6元。工行C輪4977昨日報收1.22元，槓桿率4.2倍（有效3.5倍），對沖值0.84，引伸波幅升上40%，個勢好勁，有得諗，正股升上5.80元同6元，4977應該喺1.60元同2元樓上，正股跌穿4.80元止蝕。
俊樺