「Wendy，Wendy，望望呢邊呢邊，唔該！」「Wendy，Wendy，講吓得獎感受吖！」閃光燈不停的閃，「記者」們擁着我拍照，我高舉我的金牌和獎品，向台下的觀眾揮手，接受大家的祝賀。團友扮成的「記者」與我這個「付碌」冠軍笑作一團！
我其實是第9屆龍平滑雪場第1次FunSki&SnowFestival的女子雪兜組冠軍，感受？「好玩囉、好開心囉！贏冠軍唔使夠分，最緊要夠Fun就得㗎嘞！」
口述：Wendy 記者、攝影：廖秀娟
鳴謝：韓國觀光公社、大韓航空、Aigle
實不相瞞，我其實是第一次去韓國、第一次滑雪，從來不特別愛ski，只聽說這個FunSkiFestival好好玩，唔識滑雪的人都可以玩得好開心，才勉為其難跟朋友去一趟。
但朋友沒介紹錯，早上我們換上滑雪裝備，一班人行都未識行，跌跌撞撞的來到山腳的初級滑雪道，已經見2、3百人在上課，氣氛很熱烈！所以有型教練雖然對我們頗嚴格，但一大班人始終壓力沒那麼大，即使跌到滾地葫蘆，原來隔籬嗰個仆得更肉酸，根本毋須介懷！跌吓笑吓，2個多小時的課程，基本上已滑得幾步。領隊此時還大派定心丸：明天學多半天，自己練多半天，一定會學識！後日可以參加比賽㗎喇！
未滑過都參賽
參加比賽？講笑咩！但同團幾位男士，初時都鬼咬咁話：「唔掂呀！唔識滑呀！」但滑多兩滑，晚上已經悄悄溜出去滑夜場，不知幾開心！第二晚，領隊叫我哋報名，已經有團友自告奮勇上陣；我哋幾個女仔未算滑得好，領隊就呃呃𠱁𠱁，一時話唔怕嘅玩吓啫，一時又話保證一定有獎攞，軟硬兼施；但我哋企都未企穩，可以參加乜嘢賽事呢？佢老人家話：「雪兜囉！唔使識嘅，坐上去就得㗎嘞！」又好似應付得到喎！於是我哋幾個柴娃娃又報名，淨係攞住件號碼參賽背心已經當正自己係「選手」，真正「未出發，先興奮！」領隊真係用心良苦！
付碌奪金過程
「嗱！大家坐上雪兜，唔使驚㗎，想慢就拉起個雪兜，想快就放晒手瞓直滑落去。記住，唔係淨係鬥快，仲要喺終點搶到隻吹氣狗先叫贏㗎！」識講廣東話的韓國裁判，就咁教大家兩道，我哋就一齊「處女下海」。我小心翼翼只想安全到埗，但雪兜去得比我想像中更快更刺激，不消幾秒，聽到後面人仰馬翻、幾聲慘叫，我已經無端端領先幾個馬位，狗仔在望。不過做冠軍真的不容易，我攬着狗仔驚魂未定，另一雙貪婪的手竟然伸過來想搶我的囊中物，我死攬唔放，才幸保不失。如此「付付碌碌」，八分運氣、兩分人氣，我就連續在初賽、總決賽都得冠軍，順利成為奧運－－唔係，係「幸運」金牌得主嘞！
一齊歡樂今宵
除了雪兜，嘉年華還有滑雪和snowboard初中高級別的比賽，都是旨在滑雪者有個奮鬥目標，鼓勵參與多過惡鬥；但最好是獎品卻很「認真」，除了獎牌，冠軍有Gore-tex雪褸、化妝品、貴價首飾盒……等，我就得到雪鏡一個，本來自己都想買，但要5百幾蚊唔捨得，𠵱家求仁得仁，你話我幾開心呢！
但這個尚未算高潮，最後告別晚會，主辦機構竟然當《歡樂今宵》大show咁做，book個酒店ballroom搞自助餐，先來這幾天學滑雪的精采蝦碌鏡頭，不同的跌倒、起身、又笑又叫再來過的「苦學」片段，一播全場起哄，見到自己或團友出鏡，更加激動難止，笑中有淚15分鐘，好難忘！然後是認真的搭起冠亞季軍頒獎台，請齊旅遊局局長做頒獎嘉賓，讓我們幾個得獎人上台領獎，氣氛認真得來又好搞笑，台下觀眾呼聲四起。頒完獎，懂流利廣東話的司儀，開始帶領各個有獎遊戲，跳蓮步舞、擲箭、猜拳、估歌仔……人人輕鬆不拘謹，踴躍上台；最重要是司儀的幽默抵死旁白，儍瓜遊戲都變成笑到肚孿的玩意，他一時嫌局長頒獎前致辭長篇大論，戲謔：「唉！呢個冠軍真係唔易攞！」一時又學泰國團友句句說話都有「奶」字尾音，成晚笑到標眼淚幾次，FunSkiFestival的Fun，果然冇花假！
龍平FunSki&SnowFestival時間表：
滑雪嘉年華每年在12至3月間舉行，12至2月每月2次，3月一次，每次為期4天，包括2天半學習課程、1天練習及半天比賽，大家會有足夠時間在輕鬆、有趣的環境下學曉及享受滑雪樂趣。地點在龍平及茂朱滑雪場，每年這期間滑雪場及旅行社都有套餐推出，包括機場接送、食宿、課程、所有滑雪裝備，大家可以玩得更方便。
龍平滑雪場
地址：江原道平昌郡道岩面龍山裏130
電話：（82）2-32701231
前往方法：機場及首爾酒店皆有接駁巴士前往，車程約3小時，查詢：（82）2-25757710
出門handbook
簽證：持BNO或特區護照均毋須簽證。查詢：25294141（南韓駐港領事館）
機票：大韓航空直飛仁川機場，價錢$2,490起，查詢：23900421（學聯旅遊）
旅行團：5天團，包括2天半滑雪嘉年華活動所有滑雪費用、課程及住宿於滑雪場度假村，HK$4,690起，查詢：23012313（韓國旅行社）
旅遊查詢：www.tour2korea.com、www.ktstravel.com.hk
手機制式：只適用3G或當地CDMA手機。CDMA手機在仁川機場租用比在香港租平得多，在韓國觀光公社網站預訂更有折扣。
貨幣：1港幣約兌114韓圜
電壓：220V，兩圓腳
時差：快香港1小時
長途電話國家號碼：82
由南韓江原道寄明信片回港，需350韓圜，約HK$3；寄空郵，需480韓圜，約HK$4.2。
今日江原道
氣溫-6--1℃
濕度80％
12-2月：約-20至6度之間，各滑雪場已鋪滿厚雪，大家盡情玩雪。
3-5月：氣溫0至20多度，百花盛放，是賞櫻的好季節。
6-8月：平均20多度，江原道大部份為山區氣候，夏天仍然清涼。
9-11月：平均10多度，賞紅葉的最佳季節；10月下旬已經會下第一場雪。