何韻詩勇奪叱咤女歌手金獎，前晚東亞唱片公司老闆林建岳在跑馬地一家日本料理大宴群臣，一晚豪花10萬元，為何韻詩攞獎慶祝，何爸爸、何媽媽以及黃偉文都一早到場。昨日阿詩出席無綫「勁歌金曲二十五週年名人廊」揭幕禮時，提起慶功仍然十分興奮，她說：「今次係老闆畀錢，好開心，叫咗好多攞獎意大利名酒同埋日本酒飲，我爹哋好高興，飲咗好多，我自己就唔敢飲咁多，一來我唔飲得，二來我噚晚要上電台節目，所以都係飲少少，不過上到電台做節目highhigh哋。」
此外，阿詩被問到好友容祖兒被取笑在叱咤頒獎禮的造型似燒鵝湖，阿詩力撐祖兒說：「燒鵝咁黑，佢咁白，總之着衫最緊要係舒服，夠有人話我扮阿梅啦！遲啲我笠個膠袋都有人話我扮阿梅。」
採訪：楊潔雯、駱華齡
攝影：林德雄