邱淑貞（豆斗）噚日一家大細喺下晝三點拖住一大車行李步出機場嘅抵港大堂，沈嘉偉抱住細女，豆斗就拖住兩個細路女，其中一個係佢大女沈月。記者問佢哋去完邊度旅行，佢哋一家人都不發一言，豆斗身旁嘅細路女仲問佢：「點解咁多人會影你相嘅？」豆斗就笑笑口話：「因為你靚女囉。」兩個小朋友見到記者不停影相都匿喺豆斗後面。