去年國企股炒到㷫烚烚，特別係具有A股概念嘅國企，股價屢創新高，令好多散戶賺到盤滿缽滿，但原來仲有一隻H指成份股尚未炒A股概念，股價仲未發力，網友阿牛就喺《公眾投資168綜合論壇》鋪咗以上嘅問題考吓網友。
未炒A股概念
Santoluk估中答案，「梗係中海集運（2866）啦，呢隻嘢我10月捕到𠵱家都只係升小小，真係氣上心頭！唉，都唔知呢啲航運股幾時先至發力。」原來中海集運嘅股價由06年年頭高位2.95元，不斷向下插，最低曾見1.75元，到11月份先至企穩係兩蚊樓上，埋單計06年全年股價挫21%。
其實，網友Santoluk已經好好彩，都算有些少錢執，因為連「香港畢菲特」李兆基都因為呢隻中海集運跌眼鏡，𠵱家仍然坐艇，四叔以招股價3.175元認購咗1億股，以噚日嘅股價去計，目前賬面仍要蝕7600萬有多。
隨住今年港股首個交易日開紅盤後，航運股中海集運亦開始發力，呢幾個交易日，股價已急升15%，昨收報2.41元；如果佢將來真係會發A股，更會引來大批股民追捧，你話到時佢嘅股價又點會唔水漲船高呢。
近日，一些長期潛水的中資股亦開始發力，好以晶片股中芯國際（981），噚日嘅股價飆升咗近13%，報1.23元。再睇真啲，原來佢舊年中曾經研究過分拆上海業務喺A股獨立上市──又係炒A股概念。