踏入07年首次和讀者見面，先祝大家在球場得心應手，最緊要是遠離傷患，健健康康；順道祝我國NBA首席中鋒姚明快快康復，帶領火箭打破「首輪魔咒」。
談到傷患，上星期一班波友聚會，筆者因事未能赴會。事後朋友告訴我，其中一個帶來了NBA新波，諗住大家扮吓球星；誰不知12個有份落場的球員，竟有4個「篤魚蛋」（即弄傷手指）。姑勿論新波如何令勒邦占士及加尼特等球星怨聲載道，最少我的朋友就對其彈不絕口：要帶住一隻腫手指迎接2007當然不好過。
阿蘭拿斯「烤熟」高比
財爺會否順應民意減稅未知，但NBA總裁史坦就兼聽意見做番次好戲。他與球員開會後從善如流，於新一年用回傳統皮球。之前數場失準的加尼特即時手風轉順，命中率跳升至逾6成兼攻入32分，順利帶領木狼贏波。最犀利還是塞爾特人，要連打兩場（backtoback）比賽的他們，在周日用完新波後即於周一改用舊波作賽，最後仍成功擊敗山貓；難怪教練李華士可以淡然道出，不介意用哪種球作賽。
至於新一年睇NBA必識詞彙，要數巫師阿蘭拿斯掛在口邊的Hibachi；這個據維基百科解釋是源自日本鐵板燒的詞語，今日在NBA已等同舊日的onfire（着火，即逢射必入）。上次對拜恩攻入60分後，不少美國網站更大字標題，寫上「阿蘭拿斯Hibachi烤熟神戶牛柳」（高比拜恩名字Kobe即日本的神戶），令這詞更聲名大噪。今年打波時想同人講自己好準，記住大聲嗌Hibachi啦！
望金塊連贏20場
大家許咗新年願望未？作為一個艾華遜（AI）球迷，最想的當然是他於金塊新生。不經不覺安東尼就快復出，加上AI的話……；我今年的新年願望就是這對金塊二人組場場夾埋攻入70分，新一年連贏20場，打入西岸決賽與馬刺爭霸！
仙道彬
電郵：[email protected]
逢星期二、四見報