如果話喺灣仔會展開數千人演唱會，冇乜特別；若果開嘅係投資講座，仲係超過3000人嘅，咁會唔會嚇親你？月底就有一個咁大型嘅喺會展舉行，主辦機構係去年豪派花紅嘅高盛。
上季窩輪成交每日動輒過百億，全年平均每日72億，造就輪商利潤水漲船高，高盛亦大舉進軍窩輪市場。該行衍生工具部主管李頌慈，自05年由法興跳槽去高盛後，上季首次帶領高盛晉身五大發行商之列，由05年尾市場初哥躋身前列地位，不負窩輪天后之名。
李頌慈趙海珠打對台
新公司加入市場，需要大量宣傳增加知名度，高盛亦唔例外。李頌慈憑佢上鏡嘅臉孔推銷窩輪深入民心，憑本身知名度，接受電視同埋報紙訪問。另外又舉辦大型窩輪講座，增加投資者對窩輪認識之餘，又可直接與投資者接觸。連近期無綫花旦趙海珠都跳槽法巴推介窩輪，就知呢個市場競爭幾咁犀利。
高盛舊年5月曾經喺會展舉辦千人投資講座，今次再接再厲，規模就加碼，籌備喺月底舉行全港最大型窩輪投資講座，希望人數有3500名，唔知有幾多股民會去捧場呢？