06年趕搭「尾班車」嘅新股，霸到頭位嘅就升到開巷，排隊尾嘅就好壞參半，即使有「香港畢菲特」李兆基撐腰，陽光房託（435）噚日收報2.27元，只升0.44%；至於隻海天國際（1882）則收3.56元，升1.71%，兩隻都依然未見家鄉。
往績差 避房託
散戶個心十五十六，搞到07年打頭炮嘅台一國際（1808），孖展聽講反應麻麻，有股票行仲未借過大額孖展。揸過陽房、海天同民安（1389）嘅網友362436喺《XocatII討論區》好灰咁問：「現在抽新股熱潮完未？」
網友skywide回應：「未完嘅，但唔好對嚟緊嘅新股期望太高。」potatogundam好冷靜話：「我估明年新股質素唔太突出，要小心。」如果撻Q嘅富豪房託（1881）捲土重來，zd363636就話要避免。
東泰證券研究部董事鄧聲興指出，明年新股熱仍然持續，焦點依然係中資金融股，A+H股同步嘅數目會增加，但整體氣勢會比06年弱少少，事關「巨無霸」嘅工行（1398）、中行（3988）等已掛牌，打算排隊上市嘅將會係二線城市發展嘅商業型銀行，例如中信同光大銀行，雖則集資規模估計只約百多億元，但由於機構營運較有彈性，增長速度隨時快過大行。由於中證監批准中資銀行喺07年開始，可以發股併購細行，佢估計內地金融業好似80年代嘅美國咁，有排旺喎。
至於有3G概念嘅電訊股，鄧聲興亦認為係市場炒作焦點。另外，佢預期人民幣今年會升值5%，所以繼續睇好大陸地產股；要落注08奧運概念，則可留意酒店股。