新年流流，人人都唔想見到死傷爆缸，血流披面，但係周一嘅英超就出現唔少牙煙鏡頭；熱刺小將賀森加利唔見咗4隻牙，富咸門將尼美出迎同自己友相撞後，頭先着地……，求大俠諗起都心寒呀！
熱刺作客樸茨茅夫就1:1和氣收場，但場波就一啲都唔和氣！開波冇幾耐，樸茅狂野守將柏馬洛特，就對熱刺小子賀森加利作出超勇悍攔截，令後者痛失4隻牙，其中兩隻仲係一笑就見唔到嘅門牙㖭！鏡頭仲見到有牙從口內飛出嚟一刻……，不過求大俠幾欣賞呢位「加利仔」，因佢受傷後仲捱到上半場結束先被換走，令人想起恩斯、舒活、亨特利等紮住條紅色繃帶（染滿血）繼續比賽嘅硬漢子！
唔止呀！樸茅中場桑戴維斯下半場攔低咗李榮杓後，直指對手插水，仲嚟一次案件重演，魚躍飛身落地；未見過如此場面嘅李榮杓登時面容扭曲，尷尷尬尬，此後一直被噓至完場；求大俠覺得桑戴維斯極度離譜，兼帶有歧視成份，俾着係火氣猛如堅尼之輩，隨時開拖都似！
至於富咸悶和屈福特一仗，前者門將尼美一次出迎時俾自已友跣鑊金嘅，搞到頭部落地，當場被懷疑頸骨重創，治理咗10分鐘後都要換走送院；好在檢驗過後，尼美只係頸部肌肉同韌帶受損，現已出院，算係不幸中嘅大幸。
「新年大家都想開開心心，如果隊友有事，大家都唔想，熱刺領隊祖爾賽後狂插柏馬洛特無品，但球證見到都冇畀牌，佢亦無法秋後算賬。」