港股在高位走勢變得反覆，但升勢持續，恒指曾升過240點，亦跌過60點，午後有大買盤再入市掃藍籌同中資股，結果恒指收20413，再升103點，成交大增到640億元。H股中段曾跳上10878，大升240多點，收10766，再升132點，勁勢持續。
大牛市莫估頂，可以起到你唔信，但升勢亦可以話停就停，一掉頭，短期升市浪頂就會出現。大市升得咁急，回落之勢亦會好嚇人，跌一千幾百點甚至2000點，亦係好閒，總之，跟住個大勢去玩，但要識轉身，仲要轉得快。
噚日推介嘅民安控股（1389），唔單止半日之內就去到短期目標價2.88元，仲一舉而升破3元大關，高收3.06元，大升0.49元，升幅係19%，成交更急增到2.65億股，全日都見基金大行買盤主動搶貨。中國財險（2328）一日之內又再大升12.5%，保險股未玩完，民安可繼續以止賺位持有。
有注資概念
半新股陸續發威，今日會輪到招金礦業（1818），聽講大行同基金已準備就緒，追上去，初步目標價係20元。
招金上市售價12.68元，連同超額配股權行使後，現時上市H股合共2.18億股，佔總發行7.29億股的30%。
招金招股時熱爆，公開招股部份超購530倍，凍結資金逾1160億元。
大戶睇好招金，主要係有注資概念。集團現時持有5個生產礦山，包括金翅嶺金礦、河東金礦、夏甸金礦、大尹格莊金礦，以及金亭嶺金礦（佔75%權益），而大尹格莊金礦係中國最大的地下金礦之一；5個金礦擁有的黃金資源有579.5萬盎斯，貯存量在全國排行第2。在未來3年，招金有權向母公司收購西峽招金、托里招金、甘肅天昊及中礦金業等資產，一舉而進佔內地黃金生產集團的龍頭位置。
國際金價近日已重上640美元水平，中期調整完成，今年金價可望重上700美元，對招金有利。招金上市1個月，走勢形成小圓底，大戶應已收夠貨，短線上升目標18元，中線可見20元。
郭兆誠