我喺上星期五（12月29日）嘅「06車壇回顧」中，先話去年展開嘅Showroom搬遷潮經已畫上句號，哈，點知喺嗰日臨收工收到兩封由Toyota代理發出嘅E-Mail，一封就係交代佢哋旗下各個車款喺2007年嘅最新售價，其中受惠於環保車款稅務寬減措施嘅Prius，標準版由原來$219,990調整至$223,950，而有家庭房車王美譽的Corolla，亦由$139,860起調整至$145,260，其他車款的車價亦有所調整，想買車嘅朋友就要留意，重新計過買車嘅Budget啦！
至於另一封E-Mail，就係要話畀大家聽，Toyota及Hino旗下位於荔枝角嘅Showroom喺嚟緊嘅一年，將會有重大改變；前者已於噚日結束營業，後者則會在今年初起增設全新的Toyota商用汽車中心，主力針對有心選購Hiace客貨車嘅準買家。唉，仲諗住嗰市好番多咗人買車，Showroom嘅搬遷或關閉潮會就此結束，點知踏入07年嘅第一日就已經有Showroom話要結業，真係可惜。不過唔緊要，日後想幫襯買Toyota車的話，就記得去另外5間Showroom啦！
記者、攝影：鄭達基