結婚生仔是女人必經階段，女人產後也無法避免身形走樣。個半月前剖腹誕下8磅B仔的袁詠儀（靚靚），自成為中量級師奶後，已將儀態扔在一邊。前日她偕丈夫張智霖（Chilam）到灣仔街邊檔篤魚蛋時，兩公婆竟在街頭邊行邊食，毫不在乎在人前展露騎呢食相。
袁詠儀是90年港姐冠軍兼影后級人馬，舉手投足都甚具儀態，不過35歲的她自個半月前為丈夫張智霖剖腹誕下8磅重男嬰後，至今仍未收身，變成典型師奶，生活也愈來愈平民化。以前當紅時期歎慣大魚大肉的靚靚，如今終可放下束縛，毋須顧及儀態，和老公在街邊篤魚蛋醫肚，一樣甜蜜蜜。
隨手棄掉竹籤
前日下午約5時，靚靚和Chilam拍拖遊車河，路經灣仔活道時，Chilam將其波子Jeep停在一邊，與太太齊掃街邊熟食檔。現場所見，素顏的靚靚穿鬆身衣物及圍上頸巾，卻難掩發福身形，她和Chilam買熟食時顯得相當興奮，最後她買了一串魚蛋，Chilam則買了一串生腸，兩人邊行邊食，吃得津津有味。
雖然當時有不少的士司機聚集街頭閒聊，但兩夫婦完全無視他們的目光，帶頭行的靚靚食到嘴藐藐，Chilam更加食到舔舔脷，認真有趣。不過兩人歎完魚蛋生腸後，竟隨手將竹籤丟落地，有欠公德。其後他們取車，充任柴可夫的Chilam發現記者時，也友善地揮手打招呼，才開車離去。
採訪、攝影：娛樂突發組
