恒基地產（012）旗下嘅新盤廣告，繼土瓜灣翔龍灣俾網友彈到飛起之後，另一新盤大埔比華利山別墅一樣走唔甩，個廣告搵咗幾位風水大師，唱行屋苑風水正，捧到個盤天上有地下無，不過班網民似乎唔係好受落。
freelazy喺《香港討論區》上面問：「大家對比華利山別墅搵風水師拍廣告有咩意見？大家會唔會覺得買屋要風水好呢？」
p_wh2000鐵口直斷咁講：「搵風水師傅賣樓，我覺得比請明星代言更hardsell、更欠缺說服力。」TulipLover就踩多一腳話：「同意，而且廣告時間太長，廣告內容唔吸引，若選最差樓盤廣告，非此莫屬。」hkng888搭嗲：「點吹都冇用，成間水泥廠喺旁邊，想肺積塵咪住嗰度囉。」
炒熱話題 目的已達
廣告最緊要係吸引人，成為話題，喺網上你一言、我一語咁俾人炒熱，明顯創作人已經達到目的，何況踏入新一年，好多人都鍾意睇吓風水、問吓運程，食正時機啦。