新年前睇美國人紀念福特總統嘅文章，先至知道呢位好似甚為「符碌」、「庸碌」、「蝦碌」嘅前總統，係政治界之中十分罕見嘅老實人，喺台前幕後都係同一個款。佢位私人攝影師DavidKennerly話佢只見到「一個福特」，永不講大話，做事果斷。由赦免尼克遜至越南撤軍，福特都話做就做，不拖泥帶水。尼克遜嘅國防部長賴德（MelvinR.Laird）話福特赦免尼克遜之前，問過佢嘅意見。賴德勸福特先在幕後做一番公關諮詢工夫，搵到國會支持先至宣布，但福特唔理，好快就宣布赦免，令美國人大吃一驚。亦因此令福特輸咗七六年嘅總統選舉，但福特從不為此後悔。還記得，當年尼克遜嘅政治大敵甘迺廸家族對此極為不滿，愛德華甘迺廸議員猛烈批評福特。
甘迺廸家族為咗紀念甘迺廸總統，每年頒發一個JohnF.KennedyProfileinCourageAward，五年前，呢個獎頒畀福特，以表揚佢喺一九七四年獨排眾議，宣布赦免尼克遜嘅勇氣。愛德華甘迺廸公開承認：「我曾批評他，時間證明福特總統是對的。」
福特外表魁梧，中西部鄉下佬咁嘅款，而且係密芝根大學嘅美式足球明星，好多人以為佢IQ麻麻，波牛一個，詹森總統譏笑佢「冇戴頭盔打足球太耐」，即係話佢已經俾人撞壞腦。殊不知，福特自密芝根大學畢業後，唔肯加入NFL做職業球員賺真銀，反而考入耶魯法學院（全美第一）。賴德文章透露，福特喺耶魯畢業，全班考第三，與國務卿基辛格教授辯論政策時，唔會輸蝕。福特對美國之深遠影響，除咗赦免尼克遜與撤出越南之外，就係佢入主白宮之後任用幾位年青人如切尼、拉姆斯菲爾德、格林斯潘。呢三位人物後來發揮政治經濟作用，唔使多講咯。福特之警世名言就係"Agovernmentbigenoughtogiveyoueverythingyouwantisagovernmentbigenoughtotakefromyoueverythingyouhave"。香港人千祈要記住。