剛過去的06年，油價一度在7月時逼近每桶77美元，並持續在高位徘徊，消費者為減省燃油開支，紛紛尋求慳油座駕，標榜省能的環保混燃車頓時人氣急升。
汽車購物網站Edmunds.com數字顯示，以電力及汽油發動的混燃車，銷量已接近150萬架。不過，隨着汽油價自8月開始回落，消費者對混燃車需求大不如前。Edmunds.com指出，豐田混燃車在9至10月銷量大跌22.4%，當中深受車主歡迎的Prius亦不能倖免。
到底油價跌，混燃車對美國消費者的吸引力會否即時蕩然無存？《MSNBC》討論區網友TheBeltway認為，混燃車嘅車價仲貴過普通私家車，慳埋啲油錢都唔夠抵銷買車嘅差價，而且預期汽車電池只有5至6年壽命，未來嘅維修開支亦所費不菲。「當科技發展更趨成熟，混燃車嘅生產及維修成本都會降至合理水平，到時先抵買同合乎經濟原則，但好肯定𠵱家仲未係時候！」
踩單車更環保
Concerned19就認為，顧名思義，買環保車主要目的應該係為健康着想，減少噪音同廢氣，慳番油錢只屬其次。至於有指混燃車唔夠力在高速公路上奔馳，佢就話：「呢類車最啱用嚟代步，如果諗住飆車，就應該買部跑車。」
taylorcraft078亦留言話，如果美國人真係好想慳錢，唔一定要買混燃車，車主不妨考慮停止使用汽車空調，同埋嘗試減慢行車速度。不過，混燃車確有一批支持環保嘅捧場客。Emmasdad就勸網友唔好再自欺欺人，若真係為環保，亁脆踩單車或乘搭公共交通工具。
據《華爾街日報》網站報道指，過去數年，美國汽車市道持續暢旺，但07年汽車銷售可能會降至近10年新低。美國市場研究公司IRN預計，今年轎車和輕型車輛的銷量約1630萬架，是1998年以來最低，少過今年的預期銷量1660萬架，跌幅為1.8%。不過，汽車製造商通用及豐田較樂觀，預計明年美國轎車和輕型車輛的銷量將達1650萬架。