我一向鍾意追求刺激高速快感，以前揸跑車成日俾人撩，揸返工又唔方便，最慘係跑車Load得低兼得兩隻門，我成身Suit加窄身裙，上落車辛苦又怕走光！有網友話本田有架日本版AccordEuroR，仲要係CL-7最勁嗰款，雖然外表似四門房車，但引擎同馬力跟跑車無異，內櫳設備又充滿跑格，每次加速，嗰種狂野本性令我興奮莫名，斯文又狂野，一架車雙重性格，好High啫！
記者：黃婉冰
攝影：何家亮 Model：YoYo
女仔揸出街都唔怕俾人撩
講真，起初就咁睇佢個樣真係有啲猶豫，睇極都唔似啲網友講得咁勁，後來跳上車一試，果然唔係普通房車咁簡單，坐入車廂，望見一車都係跑車格裝備，再撻匙，嘩，嗰種低沉又令人亢奮嘅引擎聲，感覺同外貌完全兩回事。一起步就知其220匹馬力非浪得虛名，扭力夠高，每次一到中、高轉加速時，嗰種澎湃感好正，感覺好似食咗大力菜咁，嗰種推背效果簡直同跑車一樣。仲有套6前速波箱，每一個波檔利落又敏捷，行程又短，每次轉波快而狠，好有跑車嗰種辣味，果然波波有力，而且多個波段玩，拖波入彎都多個Choice。
一身跑車FullGear上陣，好有「內在美」
論外表，佢真係比跑車差得遠，完全感受唔到跑車嘅壓迫力，主要原因係佢始終有四隻門，身形四四方方起晒角咁，極其量只可以話佢係一架「加辣版」四門房車。話佢加辣，係因為佢有原廠大包圍、車頭擾流連霧燈、雙出式死氣喉、白光Xenon燈，識貨者一眼就知佢係「硬嘢」，如果唔係，真係同一架普通Accord房車毫無分別。
但我就覺得，外形唔夠跑冇相干，最緊要有「內在美」，車廂用晒跑車式配套，RECARO絨料桶Seat、MOMO真皮軚環、鋁金屬波棍、碳纖內飾，唔睇個樣，真係會以為自己坐咗喺架跑車度，唔係親身試過，都唔知原來佢個房車樣下面係包住個咁重跑車感嘅餡，好啱我呢類雙重性格嘅人，日頭揸返工襯Suit夠晒大睇，夜晚去Wet同班車友遊車河「跑山」、落老蘭都唔怕失禮街坊！因為佢個樣呃得吓人，所以我𠵱家揸佢出街都唔怕會俾人撩。
話你知
「源」來歐版AccordType-R
本田一向喜以「R」為各型號嘅跑車命名，以前最為人熟悉的有NSX-R、IntegraType-R、CivicType-R等，而最新嘅AccordEuroR，查實本來都係叫做AccordType-R，但因為英國製造嘅歐洲版已經叫做AccordType-R，加上車廠想人知道呢部車由設計概念到精神都係源自歐洲版Type-R，所以就改用EuroR呢個名，Euro即「European」咁解。
抵讚：「引擎動力強勁，起步到中段加速爽快，完全無拖泥帶水嘅感覺，尤其是6前速波箱，夠明快，隔音依然可以做到如房車般，抵讚。」
要彈：「以Honda車同車廂用料嚟講，31萬車價真係貴咗少少，若然車身可以再加多少少補品，一嚟同AccordType-S更易辨別，二嚟個跑車格會更加突出，相信會更討車迷歡心。」
HondaAccordEuroRSpecifications
引擎：1,998cc直4DOHC
馬力：220ps/8,000rpm
扭力：21.0kgm/6,000rpm
傳動：6前速手波，前輪驅動
售價：＄309,000
車輛提供：偉昌汽車（23030328）
