叉燒包會唔會哽死人？但肯定二手煙每年害死千幾人！所以政府立法食肆室內全面禁煙，俾人捉到慘過做垃圾蟲，隨時罰款$5,000，相信大家都唔想以身試法！不過仍有餐廳好大膽，「光天化日」准許食客有一啖煙送一啖飯！因為佢哋係「露天食肆」！
記者：朱崇德
攝影：陳偉強、林栢鈞
空中花園包冇煙味
自《吸煙（公眾衞生）條例》生效，基本所有卡拉OK、酒吧等室內地方已經被列入「禁煙區」！半年前起同好多餐廳食肆老闆傾偈，「『飯後一支煙』未必成為絕唱！除咗因為有『暫緩禁煙申請』，更重要係仲有一啲露天餐廳，係不列入監管範圍。」
其中銅鑼灣HABITURISTORANTE，樓面4,600呎，仲有一個上千呎嘅空中大花園，餐廳負責人表示：「我哋唔會鼓勵人吸煙！不過呢個露天茶座位置係可以吸煙！為咗食客健康着想，座位間隔會做得寬鬆啲，還會種植有花草，加上呢度比較大風，所以絕冇煙味停留，對吸煙及非吸煙人士都盡量照顧到。」
AlProsciuttoDiParma$128
2mm超薄Pizza係HABITU招牌菜，一定要用意大利入口高筋麵粉先做到，好處係入口鬆脆唔Heavy、又有麵粉香；主角配料係鹹鮮的巴馬火腿，配清新的茄子、紅黃椒、火箭菜同水牛芝士，味道恰到好處。
AppleLavenderMojito$68
柳橙、西柚、檸檬加Rum酒做成的特飲，口味絕對清新，而且飲品中還加有薄荷葉，嗒一塊，口中煙味冇晒。
PrimiPiatti$105
薄切金槍魚魚生，加炸西子及檸檬皮，感覺有魚生甘香油滑之餘，入口仲一片清新；用餐時留意要將魚生捲着意式餅亁條食，由軟至脆、極有層次變化。
睇路搵食
HABITURISTORANTETHEGARDEN（28983919）
地址：銅鑼灣恩平道28號利園商場2期3樓
$250任飲紅酒芝華士
所謂「煙酒兩不分」！就今次新訂禁煙條例，衞生署控煙辦公室批准了795個暫緩禁煙申請，其中有533個是酒吧！王子酒店4樓ZIP酒吧負責人表示：「我哋唔需要暫緩禁煙申請，因為我係露天酒吧！」講到飲酒，$250（最少人數20人）任飲紅白酒，再加威士忌綠茶/蘇打水，「出面一般酒吧做緊$950一支芝華士，蘇打、綠茶全部另計，唔到埋單一刻你都唔知飲咗幾多錢；所以𠵱家興玩『任飲』，明碼實價，飲得盡情好多！而且包場玩全部自己人，亦開心好多！」另外，呢度仲有任食Buffet，加$150可有飯麵、小食，絕對可以令你飲飽食醉。
SkyLounge 維港夜景搭燒烤
王子酒店24樓仲有一個SkyLounge，一樣玩最少15人Book場任食燒烤！即燒生蠔、羊架、牛仔骨、雞翼全部有齊，由於露天關係，一樣冇「煙火管制」，每晚6點開場，玩到凌晨2點，如果加$250，一樣可以有紅白酒、芝華士，蘇打、綠茶任飲。
睇路搵食
王子酒店（31882277）
地址：灣仔謝斐道303號