06年股市暢旺，不但散戶笑逐顏開，連經紀亦「盤滿缽滿」，喺中型華資經紀行任職嘅許先生話，今年佣金收入雖然未突破00年科網熱潮時高位，但已是「沙士」過後最佳成績，整體佣金較去年增加20至30%。
自8月起交易額大增
許生話，今年每月平均佣金收入達數萬元，尤以近兩個月情況最理想，而佢同組最Top嘅經紀，每月佣金更超過10萬元，交易額過億元。佢好興奮咁話：「以近月市況睇，相信好市最少維持到明年首季。」所以佢近日亦大破慳囊，買咗一隻名貴手錶獎勵自己。
根據聯交所資料顯示，截至今年11月，以本地華資證券行為主嘅C組經紀，雖然市場佔有率沒有太大改變，維持於約11%水平，但港股交易金額則由8月開始大幅上升，8月平均每日交易金額315億元，上升至11月的每日交易金額496億元，相信唔少本地經紀都有受惠。
至於散戶，亦有唔少人大豐收，許先生話：「我嘅客今年可說全面報捷，新股表現理想，幾近逢抽中必有賺，加上唔少客今年重注中資金融股，單以國壽表現，已令客戶執唔少。」
耀才證券總經理陳啓峰都同華華講，由於股市持續攀升及新股熱潮高漲，今年生意特別好，花紅超過10個月，但早前新股浪接浪，「做（新股）孖展都做到死，根本連休息時間都唔夠，仲邊有時間消費！」
大擦鮑魚每位2000元
所以，佢趁上個禮拜聖誕節假期，同家人一齊去擦咗餐2000銀一位嘅鮑魚魚翅，當係獎勵自己，仲話如果明年時間許可，希望可以去日本旅行歎吓。