我愛足球，更鍾意施丹。今日我認識一位球場以外嘅足球魔術師，佢叫Martin，憑對科技嘅創意，佢製作出識踢波嘅足球機械人，你可以同朋友一齊組隊，透過Internet與唔同隊伍比賽。輸咗唔緊要，你有權食「禁藥」，即藉編寫程式嚟改變足球機械人嘅跑步速度、射球力度，甚至盤球技術……嘩，咁咪好玩過《WinningEleven》入面隻自創球員？
記者：陳國輝
攝影：伍慶泉
ImageGirl：Chimpy
嘩！$600自製鐵甲施丹
雖然足球機械人屬於非賣品，但問到生產一隻嘅成本係幾多錢嗰陣，Martin都好老實咁答：好平咋，$600夠晒！跟住仲拆開裏面啲部件逐一報價，佢話如果你自己有興趣整番隻，都可以落腦場買材料㗎！
Martin：坐響度做球證
製作足球機械人嘅Martin，其實係中文大學入面嘅高級技術員。「《足球機械人比賽》（簡稱IRIS）到07年已經係第三屆，目的想培育中小學生對科技有自發性研究嘅興趣，所以我哋冇打算銷售呢批機械人，如果有學校推薦學生參賽，我哋會先送兩隻畀佢哋，留番第三隻等學校自己買番，價錢好化算，成本價$600，旨在參與啫！」據講上屆就有30間學校參加《IRIS》，而今屆將有50間，加埋晒接近300隊，差唔多成千人㗎！
Martin話足球機械人係三個一隊，球場面積為4×3米左右，屋企大啲都放得落，但千祈咪睇小呢個比賽，淨係「球例」已經有10頁8頁水蛇春咁長，最好熟讀過先玩，唔係實撞板；更巴閉係，比賽時間雖然上下半場加埋只得6分鐘，但期間有一名球證及兩名旁證會負責哺住球場及電腦、監督運作、控制場面、畀分、防止打交……幾乎係踢「大場」嘅陣容，超認真，唔講得笑！
特設「球員」扮嘢大賽
作為球迷，又點想睇住當年馬勒當拿因服食禁藥被停賽先！不過，響《IRIS》你就有權食「禁藥」，Martin甚至好鼓勵大家一齊效法㖭。吓？唔係嘛。「查實比賽目的除咗想學生多啲參與，更希望大家會自發性改變足球機械人嘅能力數值，達到研究科學目的。例如編寫新程式、更換摩打配件、加裝新配件等；更有趣係，比賽同時仲有另一個足球機械人扮嘢大賽，參加者可以幫自己嘅機械人加上飾物，同樣係想發揮創意精神。」唔講唔知，以前就有學生加裝咗射球器喺機械人正前方，結果變成神射手㖭！
廿蚊買手掣上網開戰
講咗咁耐，又有實體機械人比賽、又有網上對戰，究竟係點玩㗎？其實《IRIS》有兩種比賽方式，第一種係自製模式，即係參加者將機械人自行改裝之後拎出嚟比賽，所以每個「球員」嘅能力值都唔一樣；第二種叫標準模式，就係由主辦單位提供機械人，參加者只需要上網安裝一套免費嘅專用Software，就可以隨時Online比賽。至於玩緊嗰陣更唔使勞師動眾出動Keyboard，你走去花$20買隻遊戲機手掣，接駁就即刻玩得，夠晒簡單！
新舊兩代機械人比拼
外形其實差唔多，但係第一代拎上手重好多，而且大部少少，追波嗰陣肯定冇咁敏捷。
裏面塊底板連CPU都係第一代大件啲，另外第二代改咗用AA電池，唔用鋰電，而且易改裝咗，呢樣好重要。
港台節目《香港創造力》將於1月6日晚上7點在亞視播出
http://tv.rthk.org.hk