新婚的刺激，原來可以令一直埋藏感情事的陳輝虹重生，變成風騷八卦公。前晚他拖着嬌妻黃丹儀出席叱咤頒獎禮後，即往跑馬地上演煙韌真人騷，兩公婆牽手夜遊兼大歎日本串燒，向來低調的陳輝虹竟反常追問記者問題，更着記者影藝人慶功醉態，逗得嬌妻不停羞怯微笑。
林憶蓮舊愛、EMI亞太區新媒體總裁兼金牌經理人公司藝人部總經理陳輝虹，大前年與台灣籍妻子離婚後，日前再迎第二春，與音樂才女黃丹儀靜雞雞舉行婚禮，想不到婚前極度低調的他在婚後變得風騷無比，前晚他拖嬌妻出席叱咤頒獎禮大晒恩愛後，即轉往跑馬地煙韌消夜，看來婚姻生活令他脫胎換骨。
自選差館任影
前晚陳輝虹夫婦出席頒獎禮後即結伴開餐，本來陳輝虹駕駛七人車與黃丹儀到銅鑼灣，打算買冬甩返家慢慢歎，可惜兩人發現冬甩店已關門，故將座駕駛回跑馬地藍塘別墅愛巢。雖然未能品嚐甜冬甩，但兩公婆同樣甜蜜蜜，選擇由愛巢拖手漫步到約10分鐘路程的跑馬地成和道，物色消夜食肆。
當陳輝虹夫婦十指緊扣路經跑馬地差館時，碰巧有警員截查記者，記者向警員表示正在採訪中，希望拍得照片後才問話，陳輝虹見狀即幽默地說：「咁呀，我企喺差館門口畀你影吖。」語畢他還鬼馬咬唇，拖着帶笑的黃丹儀在差館附近留影，認真搞笑。
食飽當做運動
其後二人往燒鳥亭歎日式串燒，約個半鐘後，帶頭離開的陳輝虹見記者仍在場不禁愕然說：「仲等嘅？」有記者表示可載他們返家，心情大好的陳輝虹卻笑說：「唔使啦，食飽飯咪當做運動囉。」之後他即拖着表情羞怯的嬌妻漫步回家，並邊行邊抽煙。
至抵愛巢門外時，陳輝虹忽然變成八卦公，不斷反問記者說：「其實你哋有乜可以寫呢？點解要影我哋嘅？乜唔係頒獎禮慶功宴好多嘢影嘅咩？唔係睇吓啲人有乜醉態㗎咩？……」在旁黃丹儀只一味在笑，默默聆聽丈夫發言，表現得小鳥依人，接着她才牽着丈夫，雙雙步行上樓。
採訪、攝影：娛樂突發組
