44歲的關之琳（之之）日前接受雜誌訪問時娓娓道來她的美容心得之餘，又表示計劃在內地創業，自稱愛情真空的她嘗試設計工作，發展個人品牌。咦，不知日前在上海陪之之夜蒲的台灣超級富豪郭台銘，會否在金錢或精神上支持她創業呢？
關之琳日前穿上意國品牌GianfrancoFerre春裝，戴上數百萬的HarryWinston名錶，成為內地時尚雜誌《WFD國際服裝動態》封面女郎，大談留住青春的心得。
對於常被傳媒寫她打羊胎素、隆胸等，之之表示：「人哋點寫我控制唔到，每個人要面對生老病死，我只會做運動同護理，減慢衰老，平時一定唔會做摧殘自己嘅事，唔會飲酒熬夜。感情方面，要懂得保護自己，要保持唔好有妒忌怨恨嘅心態，情緒咪唔會有咁大起伏。」
享受單身
近年之之公開的戀情只有黃家諾，對方日前已有高妹模特兒女友，雖然之之身邊不乏男伴，早前更被拍到與台灣超級富豪郭台銘夜蒲，但依然未有真命天子，她說：「單身生活比較適合我，我身邊好多朋友經歷咗結婚、離婚、再婚，其實自己覺得舒服，鍾意做乜咪可以做乜，見到朋友嘅小孩子好得意，不過太多嘢要操心太辛苦。」
沒有拖拍的之之事業上卻有新動向，她笑言：「我會同朋友喺內地做生意，推出一個屬於自己嘅品牌，同時尚有關，自己嘗試參與設計，到時會有一半時間唔喺香港。」
撰文：RitaLeung