無綫劇集《突圍行動》一班演員馬浚偉、吳卓羲、廖碧兒、楊思琦和徐子珊等，昨日到沙田馬場宣傳新劇，記者會上，無綫安排了一匹駿馬讓演員一嘗「拉頭馬」的滋味，怎料該匹馬因為睡眠不足，當場發脾氣，又起蹄，又咆哮，嚇得女演員連忙後退。
馬浚偉被指為攝石人，有份拉頭馬的他不怒反笑說：「真係陰功呀！新一年就即刻有單咁嘅新聞，不過做攝石人都好，夠磁力。」
本報拍得吳卓羲除夕夜發功翻𠝹梁靖琪（Toby）的照片，吳卓羲昨日卻說：「我係同阿峯（林峯）一齊，同Toby只係咁啱落去同一個地方，我哋係朋友，佢係高層個乜嘢（指梁家樹的女兒），唔係嗰樣嘢，係好朋友。」
而刻意瘦身的徐子珊，新一年希望回復苗條身材，她說：「最近『抽濕』成功，通過幾次淋巴去晒水腫，𠵱家瘦番，有心機打扮，好似之前拍《學警出更》我做男仔頭，連扮都唔想扮。」
楊思琦行運唔嫁
此外，有相士指楊思琦今年行大運，還有機會拉埋天窗，她說：「行大運我會好開心，不過結婚就應該唔會，我好有計劃，唔會有意外，加上只係拍咗幾年拖，我比較鍾意愛情長跑。」
採訪：楊潔雯 攝影：葉君海
