2006年給大家帶來驚喜、開心同財富；踏入07年，港股步步升高，形勢一片大好，衷心祝願大家更開心，炒股買嗰隻，升嗰隻，財富一級級上，愈聚愈多。
中資股升勢凌厲，新一年仍要繼續睇好，升得急自然會回吐，但每次調整，都係低吸機會，特別係未有大升過的，更值得追捧。
新股呢輪炒到「㷫烚烚」，未來一兩個禮拜靜一靜，未郁過嘅股份會輪到，接力而上，首選係上市個零禮拜嘅興達國際（1899），上周五收3.18元，只比上市價3.08元升10仙，有追落後概念。
興達上市後冇錯曾上過3.87元，但好快落番嚟，消息話有心人要收亁啲貨，先開始做工夫。興達發售3.86億股，超額認購98.5倍，公開發售部份回撥至1.54億股，佔40%，大戶收咗幾日，貨源應已歸邊。
睇番興達成交紀錄，上市首日已成咗3.29億股，第2日減到4900萬股，跟住3個交易日，成交由3160萬縮到1780萬股，5日合共有4.54億股轉咗手，大戶應收夠籌，一操上去，第一個目標係高價3.87元。
業務前景值得看好
睇好興達，仲有好多理由：
1.興達造子午輪胎鋼絲簾線同胎圈鋼絲，係行業龍頭，中國輪胎業全球排名第3位，而興達的產品在05年就佔內地銷量逾43%，並已成為中國10大輪胎生產商（包括本地及外資）的認可供應商，未來增長樂觀。
2.興達有大戶垂青，本地股神李兆基、新加坡政府投資及高盛旗下的創投基金共認購5400萬美元的可換股債券，對興達前景睇得好好。
3.興達上市的全球協調人及保薦人係高盛，年多前上市的雨潤食品（1068），家吓股價已一個開，有理由相信興達貨源歸邊後升勢一樣會咁勁，3.40元樓下係低吸好機會，中線持有，可以5字頭為目標。
郭兆誠