賓架陳去完滑雪返嚟，搵時間去台北，打電話嚟叫左丁山一齊去。左丁山十二年未去過台灣，一時之間諗唔到有乜好理由去台灣一行。賓架陳話：「只有一個理由，我哋星期五晚去，星期六星期日到故宮博物館睇展覽，星期日晚就返香港。」故宮博物館當然係去台北必遊之地，以前去過幾次，參觀文物，確係好到冇得彈，不過，點解𠵱家要去。
賓架陳話：「我喺日本睇到十二月二十九號嘅IHT頭版報道故官博物館已經維修翻新完畢，0六年十二月二十五號至0七年三月二十五日有珍品展覽，好多以前收埋喺地庫嘅宋代字畫、瓷器、玉雕都拎出來作第一次公開展覽，一啲珍品不能在空氣中暴露超過四十日，展出後要收埋，「休息三年」。為咗配合呢次珍品展，美國及其他國家嘅一啲博物館特別借出二十九件宋代玉器，加埋故宮收藏嘅二十一件，一齊展出，據講全世界只有七十件咋。」
俾賓架陳講到心郁郁，於是應承佢諗辦法，睇吓行唔行得開。其實賓架陳一個人隨時可以飛去台北，但搵埋幾位朋友一齊，食埋台北名菜，更加好玩。後嚟搵番IHT睇吓，報道內提到，參觀故宮博物館要趁早，因為台灣就快批准大陸同胞遊覽故宮，暫定每日一千名，預料必定爆額。你知啦，台灣旅遊界一定要求加額，人多咯喎，台北故宮變成北京秀水街咁多人，問你點有心機欣賞啲珍品？
故宮博物館好似羅浮宮一樣，須要吸引遊客，賺取收益，否則一味伸大手板問政府攞錢，博物館實會喊窮。巴黎羅浮宮雖然遊客多，但支出浩繁，維修無力，最近諗出發財大計，借出藏於地庫嘅藝術品畀可口可樂之都阿特蘭大博物館等展出三年。阿特蘭大博物館就送一千七百萬美元畀羅浮宮，用嚟維修建於十八世紀嘅法國傢俬廊。此議一出，幾位前博物館館長喺LeMonde發表聯署聲明，指出「博物館不容出售」！講咩，為咗錢乜都制呀，皇帝，你估法國人好浪漫，博物館唔識做生意？