06年大牛市，成日聽人講唔少股民都有斬獲，喺《香港討論區》就有網友發起「2006年投資股市賺蝕大調查」，反應踴躍，有成61個網友自動獻身，睇結果賺嘅人超過一半，有成45人，其中最多人賺1至5萬元；另外，有3個網友仲話自己去年賺超過100萬元（見表）。
有斬獲嘅網友好多都係靠新股發威，好似petpet7204話：「本來就蝕1萬以下，一手株洲南車（3898）IPO就賺1萬以下；其他未完成嘅交易，就賬面賺1萬以下。」正天王應該係趁舊年年尾市旺入市，佢話：「玩咗3個月，我賺唔夠1萬。」
雖然有3個網友勁賺過百萬，但蝕過百萬嘅仲多，有成5個。以馬論馬就話自己跟錯股評人，「跟大師由16000put到𠵱家，冇咗20幾萬。」
5人蝕過百萬
另外，就有網友覺得個調查唔係幾科學，話應該用回報率會好啲。fai12345678話：「我覺得應該整個百份比會好啲，因為大家基數唔同。」
不過，新年新希望yaumatei話：「本來賺幾萬，但又蝕幾萬，結果……唔怕，07年重整旗鼓……再嚟過……」
今日係07年首個交易日，祝大家今年賺多啲。