長實（001）喺元朗嘅四季豪園最近入伙，業主收樓見實用面積唔夠四成，個個牙痛咁聲，GoGoGo07響《香港討論區》以「四季豪園=細貴浩園？」為題，一班網友都戥班業主唔抵。
siuming23就話班業主咩面都無晒，「最慘同人講買咗間屋二千幾呎，入到屋得幾百呎，笑死人。」pk24121982話：「成600萬買800幾呎，同樣價錢喺何文田買間千呎單位都可以啦。」不過，hoodlum1落井下石話呢啲係買豪宅嘅代價，「唔係咁樣點叫豪！你哋有無見過皇帝食飯，會投訴個廚師打斧頭㗎先？要做到豪，係要付代價㗎啦。」
最開心係股東
lauwan扯晒火勁鬧，「人哋賣house，梗係講明幾多呎之外，另加幾多呎花園、幾多呎天台，點會咁折墮，將呢啲當係建築面積？」helpyourself仲話覺得做佢嘅小股東好丟架喎！不過smugdull就話應該好自豪先啱，「賺咁多，仲唔股價長升，股息高企！」
有網友問可唔可以向消費者委員會投訴，其實四季豪園售樓書資料列得清清楚楚，加上開售時好多份報章都有提醒買家，要留意單位實用面積，所以業主要追討賠償睇怕都幾難。都係嗰句，買樓唔同買棵菜，與其聽發展商同經紀講，不如自己睩大對眼睇清楚喇！