06年恒指埋單升5000點，約三成；H股企指數仲勁，雖然以點數計都係升5000點，但升幅就有成倍，正所謂只要夠膽買，乜水都可以做股神。雖則遇上超級大牛市，但係賺錢無人會嫌多，喺《香港討論區》就有一班網民大呻06年嘅錯誤決定。
網友pompas話佢舊年最大嘅挫折，包括喺高位入咗個名近似「即沉板」嘅建滔積層板（1888），「隻積層板喺9.5元上咗潛艇，壓住晒啲錢。喺2.5元沽晒啲中國建材（3323），死晒，每股蝕3蚊（估計係少賺3蚊）。喺3.5元太早沽建行（939），大蝕（估計都係賺少咗）。」
「即沉板」搭沉船
hilloo呻「喺4蚊走晒啲工行（1398），賺少咗；喺5蚊水平無入到交行（3328），蝕晒。不過，好彩𠵱家仍然揸住國壽（2628）……工行就由招股揸到𠵱家，仲喺3.52蚊再入咗啲㖭！」網友~KunZite~就話，痛恨自己無喺6、7蚊大手掃國壽。
除咗啲嫌賺得少嘅，重有網民哭輪喪。johnnyC話：「我買輪蝕咗成3皮嘢，唔會再買輪！」網民@CRE@仲慘，想刀仔鋸大樹借孖展炒輪，點知一鋪嘔凸，「我借孖展炒輪，但恒指喺11月尾單日急挫564點，輸晒1月至11月全部利潤，要從頭嚟過！」
亨達研究部董事黃敏碩話，06年個市咁旺，但仍然有好多人錯失賺錢機會，好大程度因為大家忽視恒指加入H股後嘅變天效應，再加上以為10月個市已經到頂，好快沽晒啲貨，所以咁多人覺得賺唔盡！佢話07年應該仲係中資股天下，但就要小心，因為好多股已升到頗貴嘅水平，總之謹慎啲啦！