上個月,除咗小小超李澤楷七度增持8號仔,捍衞大股東地位,原來仲有富豪第二代,靜靜雞成為大股東,呢個就係細細劉劉鳴煒!前一排因為叔叔細劉劉鑾鴻內幕交易罪成,有一排做唔到上市公司董事,就因為咁,大劉搵佢嗰仔劉鳴煒出嚟做華置執行董事,自己就坐主席位。
做咗董事梗係要申報權益,港交所資料顯示,細細劉響上個月15號申報,持有10.638億股華置,佢老竇大劉最新喺10月12日申報,揸住10.638億股華置,一眼睇落去,應該係大劉搵間BVI公司揸住華置,而佢個仔都有份揸住呢間公司,所以股權咪一樣囉。
不過,睇真啲,劉鳴煒比老竇揸多咗4000股華置,多過佢老竇0.07%。就係咁,華置嘅大股東其實係大劉個仔。
安排接班,人之常情,個仔生性又醒目,畀佢做大股東又點話呢!何況細細劉斷估唔會好似李察咁,將間公司拎去賣啩!唔知遲啲會唔會見到大劉兩個女同埋紅顏知己響個board度出現呢?