話咁快又一年，雖然上年社會上都發生過好多唔愉快嘅事，但整體嚟講，市面好似好番好多，人都開心咗，希望今年經濟會更好，股市會更旺，人人搵多啲錢，大家炒窩輪有豐收嘅一年。
港股上個禮拜五單日走勢麻麻，不過大勢咁好，今日都可以睇高一線。好友如果繼續雄心壯志，恒指可以乜都唔理裂口高開炒上，如果話要順番上日嘅陰陽燭走勢回番啲先，咁樣都可以掉頭高收，整番支「破腳穿頭」，咁一樣掂，等明日食住個勢大力抽高。
對上兩個交易日唔少股票都有好表現，技術走勢可能會吸引到啲圖表派追貨，平時其實無乜問題，但遇到年結就要小心啲，因為有啲股份只係做「櫥窗粉飾」，炒高年結後隨時會裂口碌番落嚟，既然知道過咗海就係神仙，幕後好多時會順便做埋派發，一個唔小心，隨時會跌落陷阱，呢類股其實唔難辨認，全年大部份時間落後大市或同類股，有波幅有跌幅成交細，突然喺年結前炒上，呢啲股最好就咪炒嘞。
新年嘅交易日，比較安全都仲係炒番啲熱門國企股。
網通C輪3597：網通（906）上個禮拜坐過山車，急升之後撻番落嚟，追貨又走唔切都幾傷，不過睇番成交變化，似震倉收貨多過散水，周線圖嘅走勢一啲都唔曳，呢個禮拜好大機會掉頭炒番上去，上個禮拜搶過上去26元，反彈就以呢個價做第1個目標。
網通C輪3597收66仙，槓桿率3.2倍（有效2.6倍），仲有150日期，溢價只係3.6%，正股升上26元，3597應該唔會低過1.10元，現價買，正股跌穿19.30元止蝕。
俊樺