上星期五國內A股升勢不止，翻查國內假期表，原來A股要到星期四至復市，比香港仲要遲兩日，長假期前都敢買到咁狠，內地股市真係旺得好緊要。
目前國內股民焦點係抽中幾多國壽A股，估計散戶中籤率都係1%多啲，機構投資者亦唔會好得多少，正如歐陽風講過好多次，A股發行量只係15億股，涉資300幾億，只及H股（2628）規模6分之1，但係內地股市卻比香港大，唔爭崩頭至奇。
計埋合共向19家戰略投資者配售合共6億股A股，即佔整體A股發行量4成，抽中機會就更加細，「有幸」成為戰略投資者嘅，包括社保基金、中國財險（2328）、中糧國際（506）母公司中糧集團等，股份有禁售期12個月。
國壽另向279家機構投資者配售3億股A股，佔20%，禁售期係3個月，網上公開發售只佔40%或6億股，試問全國咁多人去爭嘅呢6億股，每人又分得到幾多呢？
所以話，財險有幸成為戰略投資者，真係無端端有錢落袋。國壽A股以上限18.88元人民幣定價，假設首日升50%至70%，即28.32至32元，財險獲分嘅3000萬股，無端端賺2.83億至3.96億銀。點解國壽唔配畀國內大銀行？因為國壽已經獲配好多新上A股嘅銀行股，配番畀佢哋變成交叉控股，以日本嘅經驗，唔係好事。
中信買油田終落實
中信集團計劃收購嘅哈國油氣田，幾番波折後終於喺元旦日之前落實，作價19.1億美元或149億港元，而且一如市場預期畀番個認購權哈國政府，最多可買回50%。假如哈國行使權利，中信收購嘅資產依然有74億幾，注入市值98億幾嘅中信資源（1205），仍係一筆大數目。消息落實理論上會引來好消息出貨，但係幕後炒高無非為發股收購，除咗發畀母公司，好大機會發埋畀基金集資，所以好大誘因頂住個價。
歐陽風